ek aashna aksar pas se guzarta hai

ek āshnā aksar paas se guzartā hai

mujh pe merī sachchā.ī āshkār kartā hai

kis qadar haTelā hai terā be-zabāñ saaya

jism kī tarah aksar ruuh meñ utartā hai

aap kis liye mujh ko dekhte haiñ hairat se

aadmī mohabbat meñ kuchh bhī kar guzartā hai

kyā ḳhabar ye bastī hī āñdhiyoñ meñ uḌ jaa.e

ik parinda par apne kholne se Dartā hai

tere naam ke saa.e rakh ke apne hoñToñ par

sirf maiñ bikhartī huuñ tū kahāñ bikhartā hai

ik qarīb kā rishta phertā hai jab nazreñ

aadmī nahīñ martā e'tibār martā hai

be-zabāñ lakīreñ haiñ nā-murād ḳhāke haiñ

dekhnā hai ab in meñ kaun rang bhartā hai

ḳhauf qurbatoñ kā bhī ḳhauf fāsloñ kā bhī

zindagī kā har lamha Dūbtā ubhartā hai

jab tumhāre baare meñ sochtī huuñ maiñ 'ūshā'

āsmān se dil meñ nuur sā utartā hai

ek aashna aksar pas se guzarta hai

mujh pe meri sachchai aashkar karta hai

kis qadar haTela hai tera be-zaban saya

jism ki tarah aksar ruh mein utarta hai

aap kis liye mujh ko dekhte hain hairat se

aadmi mohabbat mein kuchh bhi kar guzarta hai

kya KHabar ye basti hi aandhiyon mein uD jae

ek parinda par apne kholne se Darta hai

tere nam ke sae rakh ke apne honTon par

sirf main bikharti hun tu kahan bikharta hai

ek qarib ka rishta pherta hai jab nazren

aadmi nahin marta e'tibar marta hai

be-zaban lakiren hain na-murad KHake hain

dekhna hai ab in mein kaun rang bharta hai

KHauf qurbaton ka bhi KHauf faslon ka bhi

zindagi ka har lamha Dubta ubharta hai

jab tumhaare bare mein sochti hun main 'usha'

aasman se dil mein nur sa utarta hai