ek arz-e-muddaa hone se pahle

ek arz-e-mudda.ā hone se pahle

soch lenā thā ḳhudā hone se pahle

ḳhvāhisheñ kitnī adhūrī rah ga.ī haiñ

jism o jaañ meñ fāsla hone se pahle

āḳhirī tahrīr hai āb-e-ravāñ par

āḳhirī bosa qazā hone se pahle

is qadar mīThā na honā chāhiye thā

un laboñ ko zā.iqa hone se pahle

us kī āñkhoñ ke piyāle nāchte haiñ

kho ga.e kitne nasha hone se pahle

kaun jaane Dūbnā hai yā ubharnā

pāniyoñ meñ rāsta hone se pahle

ḳhud-kushī kar lī chamakte chāñd ne bhī

āḳhir-e-shab aa.inā hone se pahle

shahr se shādāñ guzar jaanā hai behtar

mushta.il āb-o-havā hone se pahle

vo makīn-e-dil huā ḳhurshīd-'akbar'

ghar kā darvāza khulā hone se pahle

ek arz-e-muddaa hone se pahle

soch lena tha KHuda hone se pahle

KHwahishen kitni adhuri rah gai hain

jism o jaan mein fasla hone se pahle

aaKHiri tahrir hai aab-e-rawan par

aaKHiri bosa qaza hone se pahle

is qadar miTha na hona chahiye tha

un labon ko zaiqa hone se pahle

us ki aankhon ke piyale nachte hain

kho gae kitne nasha hone se pahle

kaun jaane Dubna hai ya ubharna

paniyon mein rasta hone se pahle

KHud-kushi kar li chamakte chand ne bhi

aaKHir-e-shab aaina hone se pahle

shahr se shadan guzar jaana hai behtar

mushtail aab-o-hawa hone se pahle

wo makin-e-dil hua KHurshid-'akbar'

ghar ka darwaza khula hone se pahle