ek bas tu nahin milta hai mujhe khone ko

ek bas tū nahīñ miltā hai mujhe khone ko

varna kyā kuchh nahīñ hotā hai yahāñ hone ko

dekh bedard zamāne kī zabūñ-hālī dekh

ek shāna nahīñ miltā hai jahāñ rone ko

rāt-bhar ḳhud se gale mil ke bahut rotī huuñ

jhūTe muñh bhī nahīñ kahtā hai koī sone ko

kitnī mailī hai havasnāk nigāhoñ kī chamak

ki samundar bhī bahut kam hai jise dhone ko

is ko bhī hijr kā tāvān to bharnā hogā

koī dam meñ hai mukāfāt-e-amal hone ko

merī āvāz bhī mujh tak nahīñ pahuñchegī jahāñ

maiñ ne apne liye rakkhā hai isī kone ko

kaise vīrān haiñ patthar se bhare khet mire

hal chalāne ko nahīñ biij nahīñ bone ko

koī kis tarah mire haal se vāqif hotā

merī āñkhoñ meñ koī ashk na thā rone ko

kho ga.e ḳhvāb to aisī bhī baḌī baat nahīñ

maiñ ne baaqī hī kahāñ chhoḌā hai kuchh khone ko

āsmānoñ meñ kise DhūñD rahī huuñ 'sīmā'

vo to baiThā hai mire dil meñ ḳhudā hone ko

ek bas tu nahin milta hai mujhe khone ko

warna kya kuchh nahin hota hai yahan hone ko

dekh bedard zamane ki zabun-haali dekh

ek shana nahin milta hai jahan rone ko

raat-bhar KHud se gale mil ke bahut roti hun

jhuTe munh bhi nahin kahta hai koi sone ko

kitni maili hai hawasnak nigahon ki chamak

ki samundar bhi bahut kam hai jise dhone ko

is ko bhi hijr ka tawan to bharna hoga

koi dam mein hai mukafat-e-amal hone ko

meri aawaz bhi mujh tak nahin pahunchegi jahan

main ne apne liye rakkha hai isi kone ko

kaise viran hain patthar se bhare khet mere

hal chalane ko nahin bij nahin bone ko

koi kis tarah mere haal se waqif hota

meri aankhon mein koi ashk na tha rone ko

kho gae KHwab to aisi bhi baDi baat nahin

main ne baqi hi kahan chhoDa hai kuchh khone ko

aasmanon mein kise DhunD rahi hun 'sima'

wo to baiTha hai mere dil mein KHuda hone ko