ek be-nam si diwar hai bahar mere

ek be-nām sī dīvār hai bāhar mere

kaun jaane jo nayā shahr hai andar mere

fan ke paimāne subuk harf ke kuuze nāzuk

kaise samjhā.ūñ ki kuchh dukh haiñ samundar mere

koī mausam ho mirī chhap mirā rañg apnā hai

merī ye vaz.a ki be-vaz.a haiñ manzar mere

mere hī ruḳh kā araq jauahr-e-gul-hā-e-hunar

zar-garī kaam mirā zaḳhm muqaddar mere

kaise maiñ paañv kī gardish ko ġhalat Thahrā.ūñ

ki hai gardish hī kā ehsān lahū par mere

ab ke bhī chashm-e-numū jaagī to kyā farq paḌā

vahī sūrat ki samar auroñ ke patthar mere

tajraba kar le mire shahr kī sarhad pe ġhanīm

lauh-e-maidān mirā harf haiñ lashkar mere

aane vāloñ se kaho yuuñ na kareñ shor buland

ka.ī ghar aur bhī haiñ ghar ke barābar mere

bol haiñ ras na sahī lamhe meñ narmī na sahī

kuchh to hai baat jo shohre haiñ ye 'mahshar' mere

ek be-nam si diwar hai bahar mere

kaun jaane jo naya shahr hai andar mere

fan ke paimane subuk harf ke kuze nazuk

kaise samjhaun ki kuchh dukh hain samundar mere

koi mausam ho meri chhap mera rang apna hai

meri ye waza ki be-waza hain manzar mere

mere hi ruKH ka araq jauahr-e-gul-ha-e-hunar

zar-gari kaam mera zaKHm muqaddar mere

kaise main panw ki gardish ko ghalat Thahraun

ki hai gardish hi ka ehsan lahu par mere

ab ke bhi chashm-e-numu jagi to kya farq paDa

wahi surat ki samar auron ke patthar mere

tajraba kar le mere shahr ki sarhad pe ghanim

lauh-e-maidan mera harf hain lashkar mere

aane walon se kaho yun na karen shor buland

kai ghar aur bhi hain ghar ke barabar mere

bol hain ras na sahi lamhe mein narmi na sahi

kuchh to hai baat jo shohre hain ye 'mahshar' mere