ایک دم بھی جسے اس دل سے بھلایا نہ گیا

ایک دم بھی جسے اس دل سے بھلایا نہ گیا

وہ قریب آیا تو سینے سے لگایا نہ گیا

کر دیا جلوۂ رخسار نے ایسا بے خود

ہم سے احوال دل زار سنایا نہ گیا

اجنبی بن کے سر راہ ملے ہیں مجھ سے

جن کی دیوار کا سر سے مرے سایا نہ گیا

میرے پہلو میں جو اک چیز تھی کیا ہو گئی وہ

ہم ہیں اور تم ہو یہاں پر کوئی آیا نہ گیا

یوں تو اس دوش پہ سو بار گراں تھے لیکن

ناز اک تیری محبت کا اٹھایا نہ گیا

بڑھ گیا فرض کا احساس جنوں کی حد تک

لیکن اس سر سے تری زلف کا سایا نہ گیا

پی گیا اشک کا طوفان بھی صفدرؔ لیکن

رنگ چہرے کا بہر حال چھپایا نہ گیا