ek dam bhi jise is dil se bhulaya na gaya

ek dam bhī jise is dil se bhulāyā na gayā

vo qarīb aaya to siine se lagāyā na gayā

kar diyā jalva-e-ruḳhsār ne aisā be-ḳhud

ham se ahvāl-e-dil-e-zār sunāyā na gayā

ajnabī ban ke sar-e-rāh mile haiñ mujh se

jin kī dīvār kā sar se mire saayā na gayā

mere pahlū meñ jo ik chiiz thī kyā ho ga.ī vo

ham haiñ aur tum ho yahāñ par koī aaya na gayā

yuuñ to is dosh pe sau bār-e-garāñ the lekin

naaz ik terī mohabbat kā uThāyā na gayā

baḌh gayā farz kā ehsās junūñ kī had tak

lekin is sar se tirī zulf kā saayā na gayā

pī gayā ashk kā tūfān bhī 'safdar' lekin

rang chehre kā bahar-hāl chhupāyā na gayā

ek dam bhi jise is dil se bhulaya na gaya

wo qarib aaya to sine se lagaya na gaya

kar diya jalwa-e-ruKHsar ne aisa be-KHud

hum se ahwal-e-dil-e-zar sunaya na gaya

ajnabi ban ke sar-e-rah mile hain mujh se

jin ki diwar ka sar se mere saya na gaya

mere pahlu mein jo ek chiz thi kya ho gai wo

hum hain aur tum ho yahan par koi aaya na gaya

yun to is dosh pe sau bar-e-garan the lekin

naz ek teri mohabbat ka uThaya na gaya

baDh gaya farz ka ehsas junun ki had tak

lekin is sar se teri zulf ka saya na gaya

pi gaya ashk ka tufan bhi 'safdar' lekin

rang chehre ka bahar-haal chhupaya na gaya