ek dhundle se naqsh-e-pa ke siwa

ek dhuñdle se naqsh-e-pā ke sivā

paas kuchh bhī nahīñ vafā ke sivā

tum zamāne se vāsta rakkho

merā koī nahīñ ḳhudā ke sivā

aaj tak maiñ ne kuchh nahīñ māñgā

ik dil-e-dard-āshnā ke sivā

aap sab ko gale lagā leñge

haañ magar merī iltijā ke sivā

mere hoñToñ pe kuchh nahīñ yā-rab

ik yahī harf-e-iltijā ke sivā

ab to lagtā hai tujh se milne kā

rāsta kuchh nahīñ duā ke sivā

ye bhī sach hai ki ham ġharīboñ kī

koī daulat nahīñ anā ke sivā

merī mahrūmiyoñ ne jaanā hai

zindagī kuchh nahīñ sazā ke sivā

arsh ko koī chhū nahīñ saktā

sirf mazlūm kī sadā ke sivā

'tāj' maiñ ne jahān-e-hastī meñ

kuchh bhī sīkhā nahīñ vafā ke sivā

ek dhundle se naqsh-e-pa ke siwa

pas kuchh bhi nahin wafa ke siwa

tum zamane se wasta rakkho

mera koi nahin KHuda ke siwa

aaj tak main ne kuchh nahin manga

ek dil-e-dard-ashna ke siwa

aap sab ko gale laga lenge

han magar meri iltija ke siwa

mere honTon pe kuchh nahin ya-rab

ek yahi harf-e-iltija ke siwa

ab to lagta hai tujh se milne ka

rasta kuchh nahin dua ke siwa

ye bhi sach hai ki hum gharibon ki

koi daulat nahin ana ke siwa

meri mahrumiyon ne jaana hai

zindagi kuchh nahin saza ke siwa

arsh ko koi chhu nahin sakta

sirf mazlum ki sada ke siwa

'taj' main ne jahan-e-hasti mein

kuchh bhi sikha nahin wafa ke siwa