ek diwane ko itna hi sharaf kya kam hai

ek dīvāne ko itnā hī sharaf kyā kam hai

zulf o zanjīr se yak-gūna shaġhaf kyā kam hai

shauq ke haath bhalā chāñd ko chhū sakte haiñ

chāñdnī dil meñ rahe ye bhī sharaf kyā kam hai

kaun is daur meñ kartā hai junūñ se saudā

tere dīvānoñ kī TuuTī huī saf kyā kam hai

aag bhaḌkī jo idhar bhī to bachegī kyā shai

shola-e-shauq kī lau ek taraf kyā kam hai

maiñ ne har mauj ko mauj-e-guzarāñ samjhā hai

varna tūfānoñ kā ruḳh merī taraf kyā kam hai

kaalī rātoñ meñ ujāle se mohabbat kī hai

subah kī bazm meñ apnā ye sharaf kyā kam hai

ek diwane ko itna hi sharaf kya kam hai

zulf o zanjir se yak-guna shaghaf kya kam hai

shauq ke hath bhala chand ko chhu sakte hain

chandni dil mein rahe ye bhi sharaf kya kam hai

kaun is daur mein karta hai junun se sauda

tere diwanon ki TuTi hui saf kya kam hai

aag bhaDki jo idhar bhi to bachegi kya shai

shola-e-shauq ki lau ek taraf kya kam hai

main ne har mauj ko mauj-e-guzaran samjha hai

warna tufanon ka ruKH meri taraf kya kam hai

kali raaton mein ujale se mohabbat ki hai

subah ki bazm mein apna ye sharaf kya kam hai