ek dilkash zahr se labrez paimane ka nam

ek dilkash zahr se labrez paimāne kā naam

zindagī kyā hai ḳhushī se jal ke mar jaane kā naam

aql hai bil-maslahat be-ai.tmādi kī ravish

ishq hai be-sāḳhta īmān le aane kā naam

āgahī kyā hai musalsal ḳhud-farebī kā chalan

raushnī kyā hai fareb mustaqil khāne kā naam

ḳhāmushī uryānī-e-mafhūm kā tābish-kada

guftugū māshūq ko malbūs pahnāne kā naam

ab mujhe dār-o-rasan kī samt muḌne dījiye

aap ne ḳhud to chunā thā mere afsāne kā naam

ḳhvāhishoñ kī ibtidā ġhunche chaTaḳhne kī sadā

ḳhvāhishoñ kī intihā phūloñ ke murjhāne kā naam

dost-dārī kā ye pairāya bhī kyā dilchasp hai

le rahe haiñ sāmne mere vo begāne kā naam

haiñ 'adam' ke zikr par kyoñ aap itne pur-ġhazab

sham.a ke hamrāh aa jaatā hai parvāne kā naam

ek dilkash zahr se labrez paimane ka nam

zindagi kya hai KHushi se jal ke mar jaane ka nam

aql hai bil-maslahat be-aitmadi ki rawish

ishq hai be-saKHta iman le aane ka nam

aagahi kya hai musalsal KHud-farebi ka chalan

raushni kya hai fareb mustaqil khane ka nam

KHamushi uryani-e-mafhum ka tabish-kada

guftugu mashuq ko malbus pahnane ka nam

ab mujhe dar-o-rasan ki samt muDne dijiye

aap ne KHud to chuna tha mere afsane ka nam

KHwahishon ki ibtida ghunche chaTaKHne ki sada

KHwahishon ki intiha phulon ke murjhane ka nam

dost-dari ka ye pairaya bhi kya dilchasp hai

le rahe hain samne mere wo begane ka nam

hain 'adam' ke zikr par kyon aap itne pur-ghazab

shama ke hamrah aa jata hai parwane ka nam