ek din zehn mein aaseb phirega aisa

ek din zehn meñ aaseb phiregā aisā

ye saman-zār nazar aa.egā sahrā aisā

maiñ ne kyā ranj diye ashk na lauTā.e mujhe

ai mire dil koī be-faiz na dekhā aisā

ek muddat se koī lahar na uTThī mujh meñ

merī āñkhoñ se chhupā chāñd kā chehra aisā

raat kahtī hai mulāqāt na hogī apnī

tū koī ḳhvāb na maiñ niiñd kā maatā aisā

jism kī sat.h pe kāġhaz kī tarah zinda haiñ

tū samundar hai na maiñ Dūbne vaalā aisā

tere chehre pe ujāle kī saḳhāvat aisī

aur mirī ruuh meñ nādār añdherā aisā

har na.e dard kī poshāk pahan lī maiñ ne

jaañ mohazzab na huī maiñ thā barahna aisā

ek din zehn mein aaseb phirega aisa

ye saman-zar nazar aaega sahra aisa

main ne kya ranj diye ashk na lauTae mujhe

ai mere dil koi be-faiz na dekha aisa

ek muddat se koi lahar na uTThi mujh mein

meri aankhon se chhupa chand ka chehra aisa

raat kahti hai mulaqat na hogi apni

tu koi KHwab na main nind ka mata aisa

jism ki sath pe kaghaz ki tarah zinda hain

tu samundar hai na main Dubne wala aisa

tere chehre pe ujale ki saKHawat aisi

aur meri ruh mein nadar andhera aisa

har nae dard ki poshak pahan li main ne

jaan mohazzab na hui main tha barahna aisa