ek ek qatra us ka shoala-fishan sa hai

ek ek qatra us kā shoa.la-fishāñ sā hai

mauj-e-sabā pe reg-e-ravāñ kā gumāñ sā hai

shāyad yahī hai hāsil-e-umr-e-gurez-pā

phailā huā dimāġh meñ har-sū dhuāñ sā hai

phāñkī hai jab se maiñ ne tire ruup kī dhanak

ehsās rañg-o-nūr kā sail-e-ravāñ sā hai

nanhā sā taar ufuq pe jo ab tak hai zau-fishāñ

tārīkī-e-hayāt pe bār-e-garāñ sā hai

shab-bhar jahāñ pighaltī rahī chāñd sī 'zamīr'

us shāḳh pe ba-shakl-e-dil ab tak nishāñ sā hai

ek ek qatra us ka shoala-fishan sa hai

mauj-e-saba pe reg-e-rawan ka guman sa hai

shayad yahi hai hasil-e-umr-e-gurez-pa

phaila hua dimagh mein har-su dhuan sa hai

phanki hai jab se main ne tere rup ki dhanak

ehsas rang-o-nur ka sail-e-rawan sa hai

nanha sa tar ufuq pe jo ab tak hai zau-fishan

tariki-e-hayat pe bar-e-garan sa hai

shab-bhar jahan pighalti rahi chand si 'zamir'

us shaKH pe ba-shakl-e-dil ab tak nishan sa hai