ek ghazal kahte hain ek kaifiyyat tari kar lete hain

ek ġhazal kahte haiñ ik kaifiyyat taarī kar lete haiñ

yuuñ duniyā par aglī chaḌhā.ī kī tayyārī kar lete haiñ

kitnī mohabbat kartā hai vo kaise kaheñ gar pūchh le koī

so a.adād-o-shumār kī ḳhātir zaḳhm-shumārī kar lete haiñ

us ke ḳhvāb uThā.e nahīñ uThte halkī-phulkī āñkhoñ se

aise meñ ham rāteñ jaag ke palkeñ bhārī kar lete haiñ

bahut ziyāda sehat-mandī ek tarah kī be-adabī hai

us se milne jaate haiñ to kuchh bīmārī kar lete haiñ

jab bhī lahū meñ rañg-e-ḳhizāñ kī saḳhtī baḌhne lag jaatī hai

chand lab o ruḳhsār bulā kar jashn-e-bahārī kar lete haiñ

sabza-e-jāñ ke harā-bharā rahne kī ek yahī sūrat hai

sūkhā paḌte hī āñkhoñ kī nahreñ jaarī kar lete haiñ

itnā maal kahāñ ki dukāñ bāzār-e-mohabbat meñ le paa.eñ

chhoTā-moTā kārobār-e-tah-bāzārī kar lete haiñ

ātish-e-shauq sivā karne ko muñh phere rahte haiñ us se

ham se sāda-lauh bhī aksar ye hushyārī kar lete haiñ

naḳhl-e-umīd harā ho jaatā hai aksar bārān-e-karam se

so ham aksar us ke dar par ḳhud ko bhikārī kar lete haiñ

vo sirf ek ke paas hī rah ke chalā jaa.e to ḳhair nahīñ hai

ruuh o badan aise mauqoñ par mārā-mārī kar lete haiñ

paañv havā jaise haiñ hamāre jin kā naqsh nahīñ rah paatā

shādī-shuda har rāhguzar kuchh din meñ kuñvārī kar lete haiñ

afsar-e-duniyā saḳht sahī 'farhat-ehsās' haiñ āḳhir ham bhī

daftar meñ bhī apnī sī kuchh kār-guzārī kar lete haiñ

ek ghazal kahte hain ek kaifiyyat tari kar lete hain

yun duniya par agli chaDhai ki tayyari kar lete hain

kitni mohabbat karta hai wo kaise kahen gar puchh le koi

so aadad-o-shumar ki KHatir zaKHm-shumari kar lete hain

us ke KHwab uThae nahin uThte halki-phulki aankhon se

aise mein hum raaten jag ke palken bhaari kar lete hain

bahut ziyaada sehat-mandi ek tarah ki be-adabi hai

us se milne jate hain to kuchh bimari kar lete hain

jab bhi lahu mein rang-e-KHizan ki saKHti baDhne lag jati hai

chand lab o ruKHsar bula kar jashn-e-bahaari kar lete hain

sabza-e-jaan ke hara-bhara rahne ki ek yahi surat hai

sukha paDte hi aankhon ki nahren jari kar lete hain

itna mal kahan ki dukan bazar-e-mohabbat mein le paen

chhoTa-moTa karobar-e-tah-bazari kar lete hain

aatish-e-shauq siwa karne ko munh phere rahte hain us se

hum se sada-lauh bhi aksar ye hushyari kar lete hain

naKHl-e-umid hara ho jata hai aksar baran-e-karam se

so hum aksar us ke dar par KHud ko bhikari kar lete hain

wo sirf ek ke pas hi rah ke chala jae to KHair nahin hai

ruh o badan aise mauqon par mara-mari kar lete hain

panw hawa jaise hain hamare jin ka naqsh nahin rah pata

shadi-shuda har rahguzar kuchh din mein kunwari kar lete hain

afsar-e-duniya saKHt sahi 'farhat-ehsas' hain aaKHir hum bhi

daftar mein bhi apni si kuchh kar-guzari kar lete hain