ایک ہمیں ہیں دیکھ لے ہم کو کیا ترے پیچھے حال ہے جی کا

ایک ہمیں ہیں دیکھ لے ہم کو کیا ترے پیچھے حال ہے جی کا

ہے یہ غلط مشہور جہاں میں کوئی نہیں دنیا میں کسی کا

سرخ ہے چہرہ لال ہیں آنکھیں تیکھی ہے چتون بگڑے ہیں تیور

وجہ تو کچھ کہئے خفگی کی کیا ہے سبب اس بے مزگی کا

سر میں کسی کی دھن جو سمائی رات دن اپنا مشغلہ ٹھہرا

ڈھونڈتے رہنا پوچھتے پھرنا کھوج لگانا اس کی گلی کا

طعنہ کسی پر طنز کسی پر جملے ہیں اس پر پھبتی ہے اس پر

اور مزے کی بات تو یہ ہے تم کو دعویٰ بے دینی کا

فصل چمن میں روپ نیا ہے باغ ہے یا اندر کی سبھا ہے

سبزے پہ عالم سبز پری کا لالے میں جلوہ لال پری کا

گوشۂ خلوت دل کی فراغت جوش جوانی رات سہانی

یار بغل میں ہاتھ میں بوتل آج مزہ ہے بادہ کشی کا

کان نمک ہیں وہ لب لعلیں بوسۂ لب ہیں شیریں شیریں

اتنی ملاحت پھر یہ حلاوت صاف مزہ ہے مصری ڈلی کا

کہتے ہیں وہ کہنے کی ہے چاہت کون ہے عاشق کس کو محبت

دوستی اب ہوتی ہے غرض کی ہے یہ زمانہ بو الہوسی کا

دیکھو خیالؔ آئینہ لگا کر کیسی اداسی چھائی ہے منہ پر

کہتے نہ تھے ہم عشق و محبت جان کا گھن ہے روگ ہے جی کا