ek hamin hain dekh le hum ko kya tere pichhe haal hai ji ka

ek hamīñ haiñ dekh le ham ko kyā tire pīchhe haal hai jī kā

hai ye ġhalat mash.hūr jahāñ meñ koī nahīñ duniyā meñ kisī kā

surḳh hai chehra laal haiñ āñkheñ tīkhī hai chitvan bigḌe haiñ tevar

vaj.h to kuchh kahiye ḳhafgī kī kyā hai sabab is be-mazagī kā

sar meñ kisī kī dhun jo samā.ī rāt-din apnā mashġhala Thahrā

DhūñDte rahnā pūchhte phirnā khoj lagānā us kī galī kā

ta.ana kisī par tanz kisī par jumle haiñ us par phabtī hai us par

aur maze kī baat to ye hai tum ko da.avā be-dīnī kā

fasl-e-chaman meñ ruup nayā hai baaġh hai yā indar kī sabhā hai

sabze pe aalam sabz-parī kā laale meñ jalva lāl-parī kā

gosha-e-ḳhalvat dil kī farāġhat josh-e-javānī raat suhānī

yaar baġhal meñ haath meñ botal aaj maza hai bāda-kashī kā

kān-e-namak haiñ vo lab-e-la.alīñ bosa-e-lab haiñ shīrīñ shīrīñ

itnī malāhat phir ye halāvat saaf maza hai misrī Dalī kā

kahte haiñ vo kahne kī hai chāhat kaun hai āshiq kis ko mohabbat

dostī ab hotī hai ġharaz kī hai ye zamāna bul-havasī kā

dekho 'ḳhayāl' ā.īna lagā kar kaisī udāsī chhā.ī hai muñh par

kahte na the ham ishq-o-mohabbat jaan kā ghun hai rog hai jī kā

ek hamin hain dekh le hum ko kya tere pichhe haal hai ji ka

hai ye ghalat mashhur jahan mein koi nahin duniya mein kisi ka

surKH hai chehra lal hain aankhen tikhi hai chitwan bigDe hain tewar

wajh to kuchh kahiye KHafgi ki kya hai sabab is be-mazagi ka

sar mein kisi ki dhun jo samai raat-din apna mashghala Thahra

DhunDte rahna puchhte phirna khoj lagana us ki gali ka

tana kisi par tanz kisi par jumle hain us par phabti hai us par

aur maze ki baat to ye hai tum ko dawa be-dini ka

fasl-e-chaman mein rup naya hai bagh hai ya indar ki sabha hai

sabze pe aalam sabz-pari ka lale mein jalwa lal-pari ka

gosha-e-KHalwat dil ki faraghat josh-e-jawani raat suhani

yar baghal mein hath mein botal aaj maza hai baada-kashi ka

kan-e-namak hain wo lab-e-lalin bosa-e-lab hain shirin shirin

itni malahat phir ye halawat saf maza hai misri Dali ka

kahte hain wo kahne ki hai chahat kaun hai aashiq kis ko mohabbat

dosti ab hoti hai gharaz ki hai ye zamana bul-hawasi ka

dekho 'KHayal' aaina laga kar kaisi udasi chhai hai munh par

kahte na the hum ishq-o-mohabbat jaan ka ghun hai rog hai ji ka