ek hi dasht tha wo bhi na khangala maine

ek hī dasht thā vo bhī na khañgālā maiñ ne

dil pe lenā nahīñ thā paañv kā chhālā maiñ ne

ghar ke Dah jaane meñ ġhaflat mirī shāmil thī magar

saarā malba dar-o-dīvār pe Daalā maiñ ne

kaash maiñ apne azā-dāroñ ko batlā saktā

kaisā dukh thā vo jise maut se Taalā maiñ ne

āḳhir-e-kār ġhulāmī se baġhāvat kar dī

aur zanjīr ko shamshīr meñ Dhālā maiñ ne

yuuñ to har shaḳhs yahāñ aañkh liye phirtā hai

par nahīñ dekhā koī dekhne vaalā maiñ ne

aur phir ik roz hamesha ke liye kho gayā maiñ

ya.anī ik roz use DhūñD nikālā maiñ ne

ek hi dasht tha wo bhi na khangala main ne

dil pe lena nahin tha panw ka chhaala main ne

ghar ke Dah jaane mein ghaflat meri shamil thi magar

sara malba dar-o-diwar pe Dala main ne

kash main apne aza-daron ko batla sakta

kaisa dukh tha wo jise maut se Tala main ne

aaKHir-e-kar ghulami se baghawat kar di

aur zanjir ko shamshir mein Dhaala main ne

yun to har shaKHs yahan aankh liye phirta hai

par nahin dekha koi dekhne wala main ne

aur phir ek roz hamesha ke liye kho gaya main

yani ek roz use DhunD nikala main ne