ek hi manzar to behtar tha hamein

ek hī manzar to behtar thā hameñ

yuuñ pas-e-manzar kā kab Dar thā hameñ

fā.iloñ se kah diyā thā hāl-e-dil

yaar behtar ghar se daftar thā hameñ

jaam meñ hotā ḳhulūs-e-dil agar

ek qatra bhī samundar thā hameñ

dil jo patthar thā vo patthar hī rahā

kyoñ koī darpesh aazar thā hameñ

ab hameñ apnī ḳhabar rahtī nahīñ

mas.ala mā'lūm ghar ghar thā hameñ

ye raqīb-e-jāñ kabhī thā nāma-bar

is se behtar to kabūtar thā hameñ

kis qadar rote the 'ārif' phuuT kar

ek kāñdhā jab mayassar thā hameñ

ek hi manzar to behtar tha hamein

yun pas-e-manzar ka kab Dar tha hamein

failon se kah diya tha haal-e-dil

yar behtar ghar se daftar tha hamein

jam mein hota KHulus-e-dil agar

ek qatra bhi samundar tha hamein

dil jo patthar tha wo patthar hi raha

kyon koi darpesh aazar tha hamein

ab hamein apni KHabar rahti nahin

masala ma'lum ghar ghar tha hamein

ye raqib-e-jaan kabhi tha nama-bar

is se behtar to kabutar tha hamein

kis qadar rote the 'arif' phuT kar

ek kandha jab mayassar tha hamein