ایک ہی منظر تو بہتر تھا ہمیں

ایک ہی منظر تو بہتر تھا ہمیں

یوں پس منظر کا کب ڈر تھا ہمیں

فائلوں سے کہہ دیا تھا حال دل

یار بہتر گھر سے دفتر تھا ہمیں

جام میں ہوتا خلوص دل اگر

ایک قطرہ بھی سمندر تھا ہمیں

دل جو پتھر تھا وہ پتھر ہی رہا

کیوں کوئی درپیش آزر تھا ہمیں

اب ہمیں اپنی خبر رہتی نہیں

مسئلہ معلوم گھر گھر تھا ہمیں

یہ رقیب جاں کبھی تھا نامہ بر

اس سے بہتر تو کبوتر تھا ہمیں

کس قدر روتے تھے عارفؔ پھوٹ کر

ایک کاندھا جب میسر تھا ہمیں