ek hi masala ta-umr mera hal na hua

ek hī mas.ala tā-'umr mirā hal na huā

niiñd puurī na huī ḳhvāb mukammal na huā

shahr-e-dil kā jo makīñ hai vo bichhaḌtā kab hai

jis qadar duur gayā aañkh se ojhal na huā

aaj bhī dil kī zamīñ ḳhushk rahī tishna rahī

aaj bhī mā.il-e-altāf vo bādal na huā

raushnī chhan ke tire ruḳh kī na mujh tak pahuñche

ek dīvār huī ye koī āñchal na huā

jin ko ik 'umr kā nazrāna diye baiThe haiñ

aaj tak us se ta'āruf bhī mufassal na huā

un se milte haiñ bichhaḌ jaate haiñ phir milte haiñ

zinda rahne kā ‘amal ham se musalsal na huā

jis pe rakhnā thī mujhe apnī asās-e-hastī

apnī qismat meñ 'munavvar' vahī ik pal na huā

ek hi masala ta-'umr mera hal na hua

nind puri na hui KHwab mukammal na hua

shahr-e-dil ka jo makin hai wo bichhaDta kab hai

jis qadar dur gaya aankh se ojhal na hua

aaj bhi dil ki zamin KHushk rahi tishna rahi

aaj bhi mail-e-altaf wo baadal na hua

raushni chhan ke tere ruKH ki na mujh tak pahunche

ek diwar hui ye koi aanchal na hua

jin ko ek 'umr ka nazrana diye baiThe hain

aaj tak us se ta'aruf bhi mufassal na hua

un se milte hain bichhaD jate hain phir milte hain

zinda rahne ka ‘amal hum se musalsal na hua

jis pe rakhna thi mujhe apni asas-e-hasti

apni qismat mein 'munawwar' wahi ek pal na hua