ek hi naqsh hai jitna bhi jahan rah jae

ek hī naqsh hai jitnā bhī jahāñ rah jaa.e

aag uḌtī phire har-sū ki dhuāñ rah jaa.e

kuchh ġharaz is se nahīñ rizq-e-gadā ho ki na ho

kūcha-o-rāh meñ āvāz-e-sagāñ rah jaa.e

ye safar vo hai ki itnā bhī ġhanīmat hai agar

apne ham-rāh yahī ḳhaak ravāñ rah jaa.e

aur kuchh roz ruke sust lahū kā mausam

aur kuchh der yahī rañg-e-ḳhizāñ rah jaa.e

aaj kal us kī tarah ham bhī haiñ ḳhālī ḳhālī

ek do din use kahiyo ki yahāñ rah jaa.e

kuchh to rah jaa.e tag-o-tāz talab meñ baaqī

vahm apnā rahe yā us kā gumāñ rah jaa.e

vo tamannā huuñ ki dil se na guzar ho jis kā

vo tamāshā huuñ ki nazroñ se nihāñ rah jaa.e

ye bhī ik marhala-e-saḳht hai ai sāhab-e-tarz

ki bayāñ kī jagah andāz-e-bayāñ rah jaa.e

naam to phir bhī baḌī baat hai duniyā meñ 'zafar'

ye bhī kyā kam hai jo kuchh apnā nishāñ rah jaa.e

ek hi naqsh hai jitna bhi jahan rah jae

aag uDti phire har-su ki dhuan rah jae

kuchh gharaz is se nahin rizq-e-gada ho ki na ho

kucha-o-rah mein aawaz-e-sagan rah jae

ye safar wo hai ki itna bhi ghanimat hai agar

apne ham-rah yahi KHak rawan rah jae

aur kuchh roz ruke sust lahu ka mausam

aur kuchh der yahi rang-e-KHizan rah jae

aaj kal us ki tarah hum bhi hain KHali KHali

ek do din use kahiyo ki yahan rah jae

kuchh to rah jae tag-o-taz talab mein baqi

wahm apna rahe ya us ka guman rah jae

wo tamanna hun ki dil se na guzar ho jis ka

wo tamasha hun ki nazron se nihan rah jae

ye bhi ek marhala-e-saKHt hai ai sahab-e-tarz

ki bayan ki jagah andaz-e-bayan rah jae

nam to phir bhi baDi baat hai duniya mein 'zafar'

ye bhi kya kam hai jo kuchh apna nishan rah jae