ایک امکان کہیں دل نے بچا رکھا ہے

ایک امکان کہیں دل نے بچا رکھا ہے

اس طرح ہجر کو آسان بنا رکھا ہے

دھوپ آتی بھی اگر ہے تو ڈری سہمی سی

رت کا چہرہ کسی برہن سا ہوا رکھا ہے

لفظ میں ڈھل کے تو تصویر بدل جائے گی

اس لئے دکھ کو کلیجہ سے لگا رکھا ہے

گیت گلزار کے یادیں تری آنسو میرے

میں نے سب ہجر کا سامان جٹا رکھا ہے

ہم تو کہتے ہی وہی ہیں جو اسے سننا ہے

اس نے ماحول ہی کچھ ایسا بنا رکھا ہے

دیکھنے بھر سے تجھے ساری تھکن مٹتی ہے

میں نے اے پھول ترا نام شفا رکھا ہے

اک تعلق سا بنا رہتا ہے خود سے میرا

ورنہ اس قافیہ پیمائی میں کیا رکھا ہے