ek imkan kahin dil ne bacha rakkha hai

ek imkān kahīñ dil ne bachā rakkhā hai

is tarah hijr ko āsān banā rakkhā hai

dhuup aatī bhī agar hai to Darī sahmī sī

rut kā chehra kisī birhan sā huā rakkhā hai

lafz meñ Dhal ke to tasvīr badal jā.egī

is liye dukh ko kaleje se lagā rakkhā hai

giit gulzār ke yādeñ tirī aañsū mere

maiñ ne sab hijr kā sāmān juTā rakkhā hai

ham to kahte hī vahī haiñ jo use sunñā hai

us ne māhaul hī kuchh aisā banā rakkhā hai

dekhne bhar se tujhe saarī thakan miTtī hai

maiñ ne ai phuul tirā naam shifā rakkhā hai

ik ta'alluq sā banā rahtā hai ḳhud se merā

varna is qāfiya-paimā.ī meñ kyā rakkhā hai

ek imkan kahin dil ne bacha rakkha hai

is tarah hijr ko aasan bana rakkha hai

dhup aati bhi agar hai to Dari sahmi si

rut ka chehra kisi birhan sa hua rakkha hai

lafz mein Dhal ke to taswir badal jaegi

is liye dukh ko kaleje se laga rakkha hai

git gulzar ke yaaden teri aansu mere

main ne sab hijr ka saman juTa rakkha hai

hum to kahte hi wahi hain jo use sunna hai

us ne mahaul hi kuchh aisa bana rakkha hai

dekhne bhar se tujhe sari thakan miTti hai

main ne ai phul tera nam shifa rakkha hai

ek ta'alluq sa bana rahta hai KHud se mera

warna is qafiya-paimai mein kya rakkha hai