ek jhonke se bikhar jaunga mera kya hai

ek jhoñke se bikhar jā.uñgā merā kyā hai

ḳhushk patte kā harī Daal pe honā kyā hai

is havāle ke sivā merā havāla kyā hai

maiñ tirā 'aks huuñ mujh meñ mirā apnā kyā hai

kyoñ lakīroñ se gurezāñ hai unhī kā ho kar

dar-o-dīvār se insān kā rishta kyā hai

samt-dar-samt bhaTaknā hai muqaddar merā

ek jhoñkā hī to huuñ merā Thikāna kyā hai

kaun pahchānegā is shahr-e-nigārāñ meñ mujhe

dhuup kā ruup jahāñ ho vahāñ saaya kyā hai

dil ke mausam se 'ibārat hai ye duniyā varna

aa.ina kyā hai nazar kyā hai nazāra kyā hai

kitnā mauhūm sā be-nām sā be-masraf sā

sab zamānoñ kī ḳhabar rakhtā hai lamha kyā hai

merī manzil haiñ bahar-gām sarakte āfāq

itnā dilchasp safar ho to Thaharnā kyā hai

har ta'alluq kī jabīñ par nazar aatī hai shikan

apnā begāna hai kyā milnā bichhaḌnā kyā hai

ab vo rotā bhī nahīñ aur na hañstā hai kabhī

jaane us shaḳhs ne is shahr meñ dekhā kyā hai

aur 'ālam bhī haiñ kyā fikr se merī haT kar

maiñ huuñ kyā chiiz mirī fikr kī duniyā kyā hai

dhuup se laḌtā hai rakhtā hai havāoñ se ḳhulūs

apne saa.e ko ḳhudā kahtā hai 'tanhā' kyā hai

ek jhonke se bikhar jaunga mera kya hai

KHushk patte ka hari Dal pe hona kya hai

is hawale ke siwa mera hawala kya hai

main tera 'aks hun mujh mein mera apna kya hai

kyon lakiron se gurezan hai unhi ka ho kar

dar-o-diwar se insan ka rishta kya hai

samt-dar-samt bhaTakna hai muqaddar mera

ek jhonka hi to hun mera Thikana kya hai

kaun pahchanega is shahr-e-nigaran mein mujhe

dhup ka rup jahan ho wahan saya kya hai

dil ke mausam se 'ibarat hai ye duniya warna

aaina kya hai nazar kya hai nazara kya hai

kitna mauhum sa be-nam sa be-masraf sa

sab zamanon ki KHabar rakhta hai lamha kya hai

meri manzil hain bahar-gam sarakte aafaq

itna dilchasp safar ho to Thaharna kya hai

har ta'alluq ki jabin par nazar aati hai shikan

apna begana hai kya milna bichhaDna kya hai

ab wo rota bhi nahin aur na hansta hai kabhi

jaane us shaKHs ne is shahr mein dekha kya hai

aur 'alam bhi hain kya fikr se meri haT kar

main hun kya chiz meri fikr ki duniya kya hai

dhup se laDta hai rakhta hai hawaon se KHulus

apne sae ko KHuda kahta hai 'tanha' kya hai