ek kafir-ada ne luT liya

ek kāfir-adā ne luuT liyā

un kī sharm-o-hayā ne luuT liyā

ik but-e-bevafā ne luuT liyā

mujh ko tere ḳhudā ne luuT liyā

āshnā.ī butoñ se kar baiThe

āshnā-e-jafā ne luuT liyā

ham ye samjhe ki marham-e-ġham hai

dard ban kar davā ne luuT liyā

un ke mast-e-ḳhirām ne maarā

un kī tarz-e-adā ne luuT liyā

husn-e-yaktā kī rahzanī tauba

ik fareb-e-navā ne luuT liyā

hosh-o-īmān-o-dīn kyā kahiye

shoḳhī-e-naqsh-e-pā ne luuT liyā

rahbarī thī ki rahzanī tauba

ham ko farmāñ-ravā ne luuT liyā

ek shola-nazar ne qatl kiyā

ek rañgīñ-qabā ne luuT liyā

ham ko ye bhī ḳhabar nahīñ 'gulzār'

kab but-e-bevafā ne luuT liyā

haa.e vo zulf-e-mushk-bū tauba

ham ko bād-e-sabā ne luuT liyā

un ko 'gulzār' maiñ ḳhudā samjhā

mujh ko mere ḳhudā ne luuT liyā

ek kafir-ada ne luT liya

un ki sharm-o-haya ne luT liya

ek but-e-bewafa ne luT liya

mujh ko tere KHuda ne luT liya

aashnai buton se kar baiThe

aashna-e-jafa ne luT liya

hum ye samjhe ki marham-e-gham hai

dard ban kar dawa ne luT liya

un ke mast-e-KHiram ne mara

un ki tarz-e-ada ne luT liya

husn-e-yakta ki rahzani tauba

ek fareb-e-nawa ne luT liya

hosh-o-iman-o-din kya kahiye

shoKHi-e-naqsh-e-pa ne luT liya

rahbari thi ki rahzani tauba

hum ko farman-rawa ne luT liya

ek shola-nazar ne qatl kiya

ek rangin-qaba ne luT liya

hum ko ye bhi KHabar nahin 'gulzar'

kab but-e-bewafa ne luT liya

hae wo zulf-e-mushk-bu tauba

hum ko baad-e-saba ne luT liya

un ko 'gulzar' main KHuda samjha

mujh ko mere KHuda ne luT liya