ek kaif-e-sarmadi se khelta rahta rahun main

ek kaif-e-sarmadī se kheltā rahtā rahūñ maiñ

bandagī meñ bandagī se kheltā rahtā huuñ maiñ

raat din zinda-dilī se kheltā rahtā huuñ maiñ

ranj-o-ġham meñ bhī ḳhushī se kheltā rahtā huuñ maiñ

āj-kal aḳhtar-shumāroñ meñ hai merā bhī shumār

raat meñ bhī raushnī se kheltā rahtā huuñ maiñ

maut meñ hī zindagī hai misl-e-parvāna mirī

sham.a kī tābindagī se kheltā rahtā huuñ maiñ

tauq-e-gardan se milā zauq-e-girāñbārī mujhe

lekin is mehnat-kashī se kheltā rahtā huuñ maiñ

banda-e-mazdūr kī izzat bachāne ke liye

izz-o-jāh-e-qaisarī se kheltā rahtā huuñ maiñ

bār-e-ḳhātir ban ga.ī go yār-e-shātir kī bisāt

lekin us par sādgī se kheltā rahtā huuñ maiñ

allah-allah merā shauq-e-jazb-e-kāmil dekhnā

fikr-e-vahdat meñ doī se kheltā rahtā huuñ maiñ

vo mire aivān-e-ġham meñ zīnat-e-guldasta hai

phuul kī afsurdagī se kheltā rahtā huuñ maiñ

vo ye kahte haiñ ki fursat meñ bahal jaatā hai dil

apne ‘ahsan-kāzmī' se kheltā rahtā huuñ maiñ

ek kaif-e-sarmadi se khelta rahta rahun main

bandagi mein bandagi se khelta rahta hun main

raat din zinda-dili se khelta rahta hun main

ranj-o-gham mein bhi KHushi se khelta rahta hun main

aaj-kal aKHtar-shumaron mein hai mera bhi shumar

raat mein bhi raushni se khelta rahta hun main

maut mein hi zindagi hai misl-e-parwana meri

shama ki tabindagi se khelta rahta hun main

tauq-e-gardan se mila zauq-e-giranbari mujhe

lekin is mehnat-kashi se khelta rahta hun main

banda-e-mazdur ki izzat bachane ke liye

izz-o-jah-e-qaisari se khelta rahta hun main

bar-e-KHatir ban gai go yar-e-shatir ki bisat

lekin us par sadgi se khelta rahta hun main

allah-allah mera shauq-e-jazb-e-kaamil dekhna

fikr-e-wahdat mein doi se khelta rahta hun main

wo mere aiwan-e-gham mein zinat-e-guldasta hai

phul ki afsurdagi se khelta rahta hun main

wo ye kahte hain ki fursat mein bahal jata hai dil

apne ‘ahsan-kazmi' se khelta rahta hun main