ایک کروٹ بھی اگر سوتے تو نیند آ جاتی

ایک کروٹ بھی اگر سوتے تو نیند آ جاتی

غم مرے ساتھ نہیں ہوتے تو نیند آ جاتی

دھوکہ دے جاتیں ہمیں غیر مناسب آنکھیں

ہم اگر دل سے نہیں روتے تو نیند آ جاتی

ہم جدائی کے نحوست بھرے پانی سے اگر

اپنی آنکھوں کو نہیں دھوتے تو نیند آ جاتی

ذہن سے جس کو کھرچنے میں لگائی اک عمر

ہم اگر دل سے اسے کھوتے تو نیند آ جاتی

بیٹھ کر شہر کے فٹپاتھ پہ ہم سوچتے ہیں

گھر کے ہوتے نہیں اکلوتے تو نیند آ جاتی

اپنی وحشت زدہ آنکھوں کی زمیں پر ہم لوگ

خواب پیچیدہ نہیں بوتے تو نیند آ جاتی

فیضؔ دنیا کے جو ان دیکھے جنازے ہیں سبھی

اپنے کاندھوں پہ نہ ہم ڈھوتے تو نیند آ جاتی