ek karwaT bhi agar sote to nind aa jati

ek karvaT bhī agar sote to niiñd aa jaatī

ġham mire saath nahīñ hote to niiñd aa jaatī

dhoka de jātīñ hameñ ġhair-munāsib āñkheñ

ham agar dil se nahīñ rote to niiñd aa jaatī

ham judā.ī ke nahūsat-bhare paanī se agar

apnī āñkhoñ ko nahīñ dhote to niiñd aa jaatī

zehn se jis ko khurachne meñ lagā.ī ik umr

ham agar dil se use khote to niiñd aa jaatī

baiTh kar shahr ke fōt-pāth pe ham sochte haiñ

ghar ke hote nahīñ iklaute to niiñd aa jaatī

apnī vahshat-zada āñkhoñ kī zamīñ par ham log

ḳhvāb pechīda nahīñ bote to niiñd aa jaatī

'faiz' duniyā ke jo an-dekhe janāze haiñ sabhī

apne kāñdhoñ pe na ham Dhote to niiñd aa jaatī

ek karwaT bhi agar sote to nind aa jati

gham mere sath nahin hote to nind aa jati

dhoka de jatin hamein ghair-munasib aankhen

hum agar dil se nahin rote to nind aa jati

hum judai ke nahusat-bhare pani se agar

apni aankhon ko nahin dhote to nind aa jati

zehn se jis ko khurachne mein lagai ek umr

hum agar dil se use khote to nind aa jati

baiTh kar shahr ke foot-path pe hum sochte hain

ghar ke hote nahin iklaute to nind aa jati

apni wahshat-zada aankhon ki zamin par hum log

KHwab pechida nahin bote to nind aa jati

'faiz' duniya ke jo an-dekhe janaze hain sabhi

apne kandhon pe na hum Dhote to nind aa jati