ek ke ghar ki KHidmat ki aur ek ke dil se mohabbat ki

ek ke ghar kī ḳhidmat kī aur ek ke dil se mohabbat kī

donoñ farz nibhā kar us ne saarī umr ibādat kī

dast-e-talab kuchh aur baḌhāte haf-iqlīm bhī mil jaate

ham ne to kuchh TūTe-phūTe jumloñ hī pe qanā.at kī

shohrat ke gahre dariyā meñ Duube to phir ubhre nahīñ

jin logoñ ko apnā samjhā jin logoñ se mohabbat kī

ek dorāhā aisā aayā donoñ TuuT ke gir jaate

bachchoñ ke hāthoñ ne sambhālā būḌhoñ hī ne hifāzat kī

jāma-e-ulfat bunte aa.e rishtoñ ke dhāgoñ se ham

umr kī qaiñchī kaaT ga.ī ab kaahe ko itnī mehnat kī

ek ke ghar ki KHidmat ki aur ek ke dil se mohabbat ki

donon farz nibha kar us ne sari umr ibaadat ki

dast-e-talab kuchh aur baDhate haf-iqlim bhi mil jate

hum ne to kuchh TuTe-phuTe jumlon hi pe qanaat ki

shohrat ke gahre dariya mein Dube to phir ubhre nahin

jin logon ko apna samjha jin logon se mohabbat ki

ek doraha aisa aaya donon TuT ke gir jate

bachchon ke hathon ne sambhaala buDhon hi ne hifazat ki

jama-e-ulfat bunte aae rishton ke dhagon se hum

umr ki qainchi kaT gai ab kahe ko itni mehnat ki