ایک لمحہ ابھی تک جو گزرا نہ تھا

ایک لمحہ ابھی تک جو گزرا نہ تھا

حادثہ کوئی اندھی ڈگر کا نہ تھا

سر میں شاید جھنا جھن جھنن ان کی تھی

جن گناہوں کا اب تک ارادہ نہ تھا

کھو گئی تھی کہیں مٹھیوں کی ہوا

ہم نے انجام شاید یہ سوچا نہ تھا

نارسائی بھی کب تھی یہاں درمیاں

موسموں کو ابھی اس نے پرکھا نہ تھا

تھی اسی اک ارادے کی آہٹ ابھی

ابر بن کر ابھی تک جو برسا نہ تھا

کامراں ساعتوں کی لیے تھا پھبن

شوخ نشہ تکانوں کا اترا نہ تھا

وہ ثوابوں کو شاید نہیں چن سکا

ایک لمحہ بدن بھر جو مچلا نہ تھا

آج پلکوں پہ سیال یادیں نہ تھیں

رنگ خوابوں کا بھی کچھ سنہرا نہ تھا

رائیگاں سے سبھی آج امکان تھے

اب دعا کے لئے ہاتھ اٹھتا نہ تھا

ذہن کی وہ فراموشیاں الاماں

آج جن کا زبانوں پہ چرچا نہ تھا