ایک لمحے کو تازہ ہوا جو چلی عمر بھر کی گھٹن کا خیال آ گیا

ایک لمحے کو تازہ ہوا جو چلی عمر بھر کی گھٹن کا خیال آ گیا

لاکھ مشکل سہی ضبط کرنا مگر اب تو خاصا ہمیں یہ کمال آ گیا

جتنی کلیاں کھلیں جتنے تارے کھلے اس کی آمد کے سب استعارے کھلے

جب تصور کے دامن میں کچھ نہ بچا میرے پہلو میں وہ بے مثال آ گیا

بات بے بات کج بحثیاں بھی گئیں وہ پرانی شکر رنجیاں بھی گئیں

اب نئی شاخ پھوٹی ہے دل میں مرے غم کا تازہ بہ تازہ نہال آ گیا

حال و ماضی مرا ایک جیسا رہا اگلے موسم کے خوابوں کا کیا فائدہ

اس کو فرصت جوابوں کی تھی ہی نہیں میرے لب پہ یہ کیسے سوال آ گیا

ہم نے سوچا تھا اس سے نہ شکوہ کریں جو گزرتی ہے دل پہ وہ خود ہی سہیں

بات جب بھی بدلتی رتوں کی ہوئی اپنے لہجے میں گویا ملال آ گیا

اک تنکے کا مجھ کو سہارا ملے میری وحشت کو اب اک کنارہ ملے

ڈوبتے ڈوبتے سانس لے لوں ذرا زندگی کا بھی آخر خیال آ گیا

چاند تھا وہ افق پر چمکتا رہا اور سورج بنا تو سروں پہ رہا

کیسے قربت پہ وہ آج مائل ہوا شاید اس کا بھی وقت زوال آ گیا

جان پہچان کا سلسلہ بھی گیا دل کا طاؤس بھی رقص فرما ہوا

وہ جو حیرت زدہ بت بنا تھا کھڑا اب تو اس کو بھی گویا دھمال آ گیا