ek lamhe ko taza hawa jo chali umr bhar ki ghuTan ka KHayal aa gaya

ek lamhe ko taaza havā jo chalī umr bhar kī ghuTan kā ḳhayāl aa gayā

laakh mushkil sahī zabt karnā magar ab to ḳhāsā hameñ ye kamāl aa gayā

jitnī kaliyāñ khilīñ jitne taare khile us kī aamad ke sab isti.āre khile

jab tasavvur ke dāman meñ kuchh na bachā mere pahlū meñ vo be-misāl aa gayā

bāt-be-bāt kaj-bahsiyāñ bhī ga.iiñ vo purānī shakar-ranjiyāñ bhī ga.iiñ

ab na.ī shāḳh phūTī hai dil meñ mire ġham kā tāza-ba-tāza nihāl aa gayā

hāl-o-māzī mirā ek jaisā rahā agle mausam ke ḳhvāboñ kā kyā fā.eda

us ko fursat javāboñ kī thī hī nahīñ mere lab pe ye kaise savāl aa gayā

ham ne sochā thā us se na shikva kareñ jo guzartī hai dil pe vo ḳhud hī saheñ

baat jab bhī badaltī rutoñ kī huī apne lahje meñ goyā malāl aa gayā

ik tinke kā mujh ko sahārā mile merī vahshat ko ab ik kināra mile

Dūbte Dūbte saañs le luuñ zarā zindagī kā bhī āḳhir ḳhayāl aa gayā

chāñd thā vo ufuq par chamaktā rahā aur sūraj banā to saroñ pe rahā

kaise qurbat pe vo aaj maa.il huā shāyad us kā bhī vaqt-e-zavāl aa gayā

jaan pahchān kā silsila bhī gayā dil kā tā.ūs bhī raqs-farmā huā

vo jo hairat-zada but banā thā khaḌā ab to us ko bhī goyā dhamāl aa gayā

ek lamhe ko taza hawa jo chali umr bhar ki ghuTan ka KHayal aa gaya

lakh mushkil sahi zabt karna magar ab to KHasa hamein ye kamal aa gaya

jitni kaliyan khilin jitne tare khile us ki aamad ke sab istiare khile

jab tasawwur ke daman mein kuchh na bacha mere pahlu mein wo be-misal aa gaya

baat-be-baat kaj-bahsiyan bhi gain wo purani shakar-ranjiyan bhi gain

ab nai shaKH phuTi hai dil mein mere gham ka taza-ba-taza nihaal aa gaya

haal-o-mazi mera ek jaisa raha agle mausam ke KHwabon ka kya faeda

us ko fursat jawabon ki thi hi nahin mere lab pe ye kaise sawal aa gaya

hum ne socha tha us se na shikwa karen jo guzarti hai dil pe wo KHud hi sahen

baat jab bhi badalti ruton ki hui apne lahje mein goya malal aa gaya

ek tinke ka mujh ko sahaara mile meri wahshat ko ab ek kinara mile

Dubte Dubte sans le lun zara zindagi ka bhi aaKHir KHayal aa gaya

chand tha wo ufuq par chamakta raha aur suraj bana to saron pe raha

kaise qurbat pe wo aaj mail hua shayad us ka bhi waqt-e-zawal aa gaya

jaan pahchan ka silsila bhi gaya dil ka taus bhi raqs-farma hua

wo jo hairat-zada but bana tha khaDa ab to us ko bhi goya dhamal aa gaya