ek mahaul achhuta chahun

ek māhaul achhūtā chāhūñ

sahn ke naam pe sahrā chāhūñ

kā.enāteñ mire ḳhvāboñ kī asiir

aur qudrat se maiñ kitnā chāhūñ

tarbiyat merī zamīñ ne kī hai

meñ ḳhalāoñ meñ lapaknā chāhūñ

jitne tārīk gharauñde haiñ vahāñ

dil kī qindīl jalānā chāhūñ

baḳhshavāne ko gunāh-e-ādam

phir se firdaus meñ jaanā chāhūñ

dozaḳh insān pe ho jaa.e harām

rab se ye vā'da-e-fardā chāhūñ

ḳhushk patte na shajar se chhīne

bas ye ehsān havā kā chāhūñ

merī zid kaun karegā puurī

shaam ko sub.h kā taarā chāhūñ

mirā har kaam alag duniyā se

jis ko chāhūñ use tanhā chāhūñ

hijr kī kitnī tamāzat hai 'nadīm'

ab kisī yaad kā saayā chāhūñ

ek mahaul achhuta chahun

sahn ke nam pe sahra chahun

kaenaten mere KHwabon ki asir

aur qudrat se main kitna chahun

tarbiyat meri zamin ne ki hai

mein KHalaon mein lapakna chahun

jitne tarik gharaunde hain wahan

dil ki qindil jalana chahun

baKHshawane ko gunah-e-adam

phir se firdaus mein jaana chahun

dozaKH insan pe ho jae haram

rab se ye wa'da-e-farda chahun

KHushk patte na shajar se chhine

bas ye ehsan hawa ka chahun

meri zid kaun karega puri

sham ko subh ka tara chahun

mera har kaam alag duniya se

jis ko chahun use tanha chahun

hijr ki kitni tamazat hai 'nadim'

ab kisi yaad ka saya chahun