ek muddat se adhura hai sarapa apna

ek muddat se adhūrā hai sarāpā apnā

gum huā jaane kahāñ bhiiḌ meñ chehra apnā

merī ḳhvāhish ke parinde ko qanā'at hai pasand

sūkhī Tahnī pe hī kartā hai baserā apnā

hirs caroñ ke ḳhazāne kī huī hai jab se

ḳhair ḳhairāt se bhartā nahīñ kaasa apnā

ham ne sīkhā hai gulāboñ se takallum kā tarīq

khurdurā ho nahīñ saktā kabhī lahja apnā

hai to 'ālam kī ḳhabar apnī ḳhabar ḳhaak nahīñ

ab tasavvur meñ hī khultā hai darīcha apnā

ukhḌī ukhḌī sī lagāvaT ko mohabbat na samajh

dhuup chamke to Thahartā nahīñ saaya apnā

ek ik saañs pe dete rahe jiine kā ḳhirāj

zindagī ne na kiyā tark taqāzā apnā

ādmiyyat se muzayyan vo kitābeñ thiiñ subuk

aaj raddī se girāñ-bār hai basta apnā

sirf ḳhvāboñ pe ijāra thā haqīqat pe nahīñ

ham sarāboñ ko samajhte rahe dariyā apnā

koī ḳhil'at na ‘ināyat kī talab hai 'sābir'

ham to likhte haiñ shab-o-roz qasīda apnā

ek muddat se adhura hai sarapa apna

gum hua jaane kahan bhiD mein chehra apna

meri KHwahish ke parinde ko qana'at hai pasand

sukhi Tahni pe hi karta hai basera apna

hirs caron ke KHazane ki hui hai jab se

KHair KHairaat se bharta nahin kasa apna

hum ne sikha hai gulabon se takallum ka tariq

khurdura ho nahin sakta kabhi lahja apna

hai to 'alam ki KHabar apni KHabar KHak nahin

ab tasawwur mein hi khulta hai daricha apna

ukhDi ukhDi si lagawaT ko mohabbat na samajh

dhup chamke to Thaharta nahin saya apna

ek ek sans pe dete rahe jine ka KHiraj

zindagi ne na kiya tark taqaza apna

aadmiyyat se muzayyan wo kitaben thin subuk

aaj raddi se giran-bar hai basta apna

sirf KHwabon pe ijara tha haqiqat pe nahin

hum sarabon ko samajhte rahe dariya apna

koi KHil'at na ‘inayat ki talab hai 'sabir'

hum to likhte hain shab-o-roz qasida apna