ek muddat se hai mere zehn par chhaya hua

ek muddat se hai mere zehn par chhāyā huā

reshmī āñchal tirī yādoñ kā lahrāyā huā

haañ tire bhūle hue vā'doñ se kuchh miltā to hai

rang in hasrat bharī sāñsoñ kā sañvlāyā huā

ai mirī majbūriyo nākāmiyo mahrūmiyo

hai koī mujh sā fareb-e-zindagī khāyā huā

yaar is māhaul meñ jiinā bahut dushvār hai

har nafas bechain har lamha hai ghabrāyā huā

naqd-e-jān-o-dil luTā baiThā tumhāre shahr meñ

ek saudāgar kahīñ pardes se aaya huā

roz is dīvār ke saa.e meñ so letā huuñ maiñ

aap se achchhā to is dīvār kā saaya huā

dil ke baare meñ unheñ 'āzar' batā denā ki vo

ek shīsha hai magar patthar se Takrāyā huā

ek muddat se hai mere zehn par chhaya hua

reshmi aanchal teri yaadon ka lahraya hua

han tere bhule hue wa'don se kuchh milta to hai

rang in hasrat bhari sanson ka sanwlaya hua

ai meri majburiyo nakaamiyo mahrumiyo

hai koi mujh sa fareb-e-zindagi khaya hua

yar is mahaul mein jina bahut dushwar hai

har nafas bechain har lamha hai ghabraya hua

naqd-e-jaan-o-dil luTa baiTha tumhaare shahr mein

ek saudagar kahin pardes se aaya hua

roz is diwar ke sae mein so leta hun main

aap se achchha to is diwar ka saya hua

dil ke bare mein unhen 'azar' bata dena ki wo

ek shisha hai magar patthar se Takraya hua