ek muddat se sar-e-baam wo aaya bhi nahin

ek muddat se sar-e-bām vo aayā bhī nahīñ

ham ko ab hasrat-e-dīdār-e-tamannā bhī nahīñ

jāda-e-shauq meñ tanhā bhī huuñ tanhā bhī nahīñ

kyā hasīñ baat hai rusvā bhī huuñ rusvā bhī nahīñ

tum jo nārāz hue ho ga.ī duniyā barham

ab to girtī huī dīvār kā saaya bhī nahīñ

kis ko maiñ duut kahūñ kis ko maiñ dushman jānūñ

sabhī apne haiñ yahāñ koī parāyā bhī nahīñ

aaj tak bhī maiñ parastish to kiye jaatā huuñ

ye alag baat ki maiñ ne tumheñ dekhā bhī nahīñ

sub.h kī sham.eñ liye phirte ho kyuuñ dīvāno

rishta-e-shab to abhī ḳhair se TuuTā bhī nahīñ

to taḳhayyul ke darīche meñ thā khoyā khoyā

paikar-e-husn tujhe maiñ ne jagāyā bhī nahīñ

kis tarah ġham ko maiñ taqsīm karūñgā yaaro

qissa-e-dard ko hālāt ne samjhā bhī nahīñ

kab talak chalnā paḌegā hameñ tanhā tanhā

ab kisī moḌ pe mil jā.eñge aisā bhī nahīñ

rū-ba-rū un ke mire hoñT na khulne paa.e

dil ko iz.hār-e-tamannā kā sahārā bhī nahīñ

jaane kyā soch ke us ne mujhe dīvāna kahā

haa.e us ko abhī mahfil pe bharosa bhī nahīñ

rābte joḌne niklā thā maiñ insāñ ke 'ḳhayāl'

kisī insāñ ne mujhe pyaar se dekhā bhī nahīñ

ek muddat se sar-e-baam wo aaya bhi nahin

hum ko ab hasrat-e-didar-e-tamanna bhi nahin

jada-e-shauq mein tanha bhi hun tanha bhi nahin

kya hasin baat hai ruswa bhi hun ruswa bhi nahin

tum jo naraaz hue ho gai duniya barham

ab to girti hui diwar ka saya bhi nahin

kis ko main dut kahun kis ko main dushman jaanun

sabhi apne hain yahan koi paraya bhi nahin

aaj tak bhi main parastish to kiye jata hun

ye alag baat ki main ne tumhein dekha bhi nahin

subh ki shamen liye phirte ho kyun diwano

rishta-e-shab to abhi KHair se TuTa bhi nahin

to taKHayyul ke dariche mein tha khoya khoya

paikar-e-husn tujhe main ne jagaya bhi nahin

kis tarah gham ko main taqsim karunga yaro

qissa-e-dard ko haalat ne samjha bhi nahin

kab talak chalna paDega hamein tanha tanha

ab kisi moD pe mil jaenge aisa bhi nahin

ru-ba-ru un ke mere honT na khulne pae

dil ko izhaar-e-tamanna ka sahaara bhi nahin

jaane kya soch ke us ne mujhe diwana kaha

hae us ko abhi mahfil pe bharosa bhi nahin

rabte joDne nikla tha main insan ke 'KHayal'

kisi insan ne mujhe pyar se dekha bhi nahin