ek muddat se sar-e-dosh-e-hawa hun main bhi

ek muddat se sar-e-dosh-e-havā huuñ maiñ bhī

itnā shaffāf ki ham-rañg-e-fazā huuñ maiñ bhī

tū bhī vāqif mirī tāsīr ke mahshar se he

aur minnat-kahs-e-altāf-o-atā huuñ maiñ bhī

tū manādir ke singhāsan pe ba-sad izz-o-vaqār

phuul kī thaal meñ lau detā diyā huuñ maiñ bhī

tū bhī iz.hār-e-ta.alluq ke sabab DhūñDtā hai

shiddat-e-shauq se joyā-e-razā huuñ maiñ bhī

haram-e-nāz kī chilman se ulajhne vaalī

dil-e-betāb-e-mohabbat kī duā huuñ maiñ bhī

mushtarī merā bhī aa.egā ye maiñ jāntā huuñ

pahle bāzār meñ aane se bikā huuñ maiñ bhī

ho jo yak-pahlū-o-yak-rañg nahīñ hai tū 'shahāb'

sho.ala-o-shabnam-o-sīmāb-o-sabā huuñ maiñ bhī

ek muddat se sar-e-dosh-e-hawa hun main bhi

itna shaffaf ki ham-rang-e-faza hun main bhi

tu bhi waqif meri tasir ke mahshar se he

aur minnat-kahs-e-altaf-o-ata hun main bhi

tu manadir ke singhasan pe ba-sad izz-o-waqar

phul ki thaal mein lau deta diya hun main bhi

tu bhi izhaar-e-talluq ke sabab DhunDta hai

shiddat-e-shauq se joya-e-raza hun main bhi

haram-e-naz ki chilman se ulajhne wali

dil-e-betab-e-mohabbat ki dua hun main bhi

mushtari mera bhi aaega ye main jaanta hun

pahle bazar mein aane se bika hun main bhi

ho jo yak-pahlu-o-yak-rang nahin hai tu 'shahab'

shoala-o-shabnam-o-simab-o-saba hun main bhi