ek muddat se talabgar hun kin ka in ka

ek muddat se talabgār huuñ kin kā in kā

tishna-e-hasrat-e-dīdār huuñ kin kā in kā

jaan ko bech ke ye naqd-e-dil ab laayā huuñ

sab se pahle maiñ ḳharīdār huuñ kin kā in kā

imtidād is mire bīmār kā mat pūchh tabīb

roz-e-mīsāq se bīmār huuñ kin kā in kā

muḳhlisī qaid se mushkil hai mujhe tā-dam-e-marg

dām-e-ulfat meñ giraftār huuñ kin kā in kā

būd-o-bāsh apnā batā.ūñ maiñ tumheñ kyā yaaro

sākin-e-sāya-e-dār huuñ kin kā in kā

hai bajā faḳhr karūñ apnī agar taalā par

kafsh-bardāroñ kā sardār huuñ kin kā in kā

gāliyāñ tujh ko jo dete haiñ ye 'hātim' haiñ kaun

kuchh na pūchho meñ gunahgār huuñ kin kā in kā

to sazā-vār-e-sazā kis kā huā hai 'hātim'

sāhib-e-man maiñ gunahgār huuñ kin kā in kā

ek muddat se talabgar hun kin ka in ka

tishna-e-hasrat-e-didar hun kin ka in ka

jaan ko bech ke ye naqd-e-dil ab laya hun

sab se pahle main KHaridar hun kin ka in ka

imtidad is mere bimar ka mat puchh tabib

roz-e-misaq se bimar hun kin ka in ka

muKHlisi qaid se mushkil hai mujhe ta-dam-e-marg

dam-e-ulfat mein giraftar hun kin ka in ka

bud-o-bash apna bataun main tumhein kya yaro

sakin-e-saya-e-dar hun kin ka in ka

hai baja faKHr karun apni agar tala par

kafsh-bardaron ka sardar hun kin ka in ka

galiyan tujh ko jo dete hain ye 'hatim' hain kaun

kuchh na puchho mein gunahgar hun kin ka in ka

to saza-war-e-saza kis ka hua hai 'hatim'

sahib-e-man main gunahgar hun kin ka in ka