ek nale mein sari raat gai

ek naale meñ saarī raat ga.ī

ek hichkī meñ kā.enāt ga.ī

daulat-e-zīst thī amānat-e-dost

ek baat aa.ī ek haat ga.ī

lutf dekhā na kuchh javānī kā

kyā palak mārte ye raat ga.ī

vaqt-e-āḳhir bhī vo nahīñ aa.e

haath maltī huī hayāt ga.ī

paas the tum maza thā jiine kā

tum ga.e lazzat-e-hayāt ga.ī

paate hī dil kā bhed vo rūThe

lab pe aa.ī na thī ki baat ga.ī

kyā milā dil ko be-nishāñ kar ke

ek bekas kī kā.enāt ga.ī

na.ash-e-afsar nahīñ uThī ye 'sarosh'

kisī nau-shāh kī barāt ga.ī

ek nale mein sari raat gai

ek hichki mein kaenat gai

daulat-e-zist thi amanat-e-dost

ek baat aai ek hat gai

lutf dekha na kuchh jawani ka

kya palak marte ye raat gai

waqt-e-aKHir bhi wo nahin aae

hath malti hui hayat gai

pas the tum maza tha jine ka

tum gae lazzat-e-hayat gai

pate hi dil ka bhed wo ruThe

lab pe aai na thi ki baat gai

kya mila dil ko be-nishan kar ke

ek bekas ki kaenat gai

nash-e-afsar nahin uThi ye 'sarosh'

kisi nau-shah ki baraat gai