ek nazuk dil ke andar hashr barpa kar diya

ek nāzuk dil ke andar hashr barpā kar diyā

haa.e ham ne kyuuñ ye iz.hār-e-tamannā kar diyā

ab nahīñ hai ḳhushk āñkhoñ meñ sivā vahshat ke kuchh

intihā-e-ġham ne kyā dariyā ko sahrā kar diyā

un ke dar ko chhoḌ kar dar dar bhaTakte ham rahe

vahshat-e-dil ne ajab anjām ulTā kar diyā

vasvase ummīd ke dam se jo the sab miT ga.e

intihā-e-dard ne ġham kā mudāvā kar diyā

lab pe luknat āñkhoñ meñ vahshat hai chehra zard hai

ishtiyāq-e-hūr ne zāhid ko kaisā kar diyā

go nahīñ ummīd us se thī ināyat kī magar

ye thā farz-e-āshiqī ham ne taqāzā kar diyā

ik nizā.a-e-mustaqil rahtī hai aql-o-shauq meñ

tark-e-ulfat ne to ab dushvār jiinā kar diyā

dil to thā ik qatra-e-ḳhūñ kyā haqīqat us kī thī

tere ġham ne qulzum-e-zaḳhḳhār jaisā kar diyā

iftirā-o-makr se shāyad tujhe miltā vaqār

haq-parastī ne tujhe ai 'kaif' rusvā kar diyā

ek nazuk dil ke andar hashr barpa kar diya

hae hum ne kyun ye izhaar-e-tamanna kar diya

ab nahin hai KHushk aankhon mein siwa wahshat ke kuchh

intiha-e-gham ne kya dariya ko sahra kar diya

un ke dar ko chhoD kar dar dar bhaTakte hum rahe

wahshat-e-dil ne ajab anjam ulTa kar diya

waswase ummid ke dam se jo the sab miT gae

intiha-e-dard ne gham ka mudawa kar diya

lab pe luknat aankhon mein wahshat hai chehra zard hai

ishtiyaq-e-hur ne zahid ko kaisa kar diya

go nahin ummid us se thi inayat ki magar

ye tha farz-e-ashiqi hum ne taqaza kar diya

ek nizaa-e-mustaqil rahti hai aql-o-shauq mein

tark-e-ulfat ne to ab dushwar jina kar diya

dil to tha ek qatra-e-KHun kya haqiqat us ki thi

tere gham ne qulzum-e-zaKHKHar jaisa kar diya

iftira-o-makr se shayad tujhe milta waqar

haq-parasti ne tujhe ai 'kaif' ruswa kar diya