ek nai zist liye aaj ajal aai hai

ek na.ī ziist liye aaj ajal aa.ī hai

qaid se ham ne rihā.ī hī kahāñ paa.ī hai

us se milne ke liye is qadar ai dil na taḌap

merā iz.hār-e-mohabbat mirī rusvā.ī hai

inqilābāt-e-zamāna ko zamāna samjhe

ham to kahte haiñ ki vo bhī tirī añgḌā.ī hai

jis ke sho.aloñ se huī husn kī rangat raushan

aag aisī mire jazbāt ne sulgā.ī hai

ham ne armānoñ kī mayyat ko diyā hai kāñdhā

ai ġham-e-dil ye tirī hausla-afzā.ī hai

hai ye Dar nuuh kā tūfāñ na samajh le duniyā

chādar-e-ashk-e-vafā ham ne jo phailā.ī hai

ā.ina-ḳhāna-e-dil meñ vo zarūr ā.eñge

un ke dil meñ bhī tamanna-e-ḳhud-ārā.ī hai

haath se saaqī ke piinā hī paḌegā mujhe ab

merī tauba-shikanī ban ke ghaTā chhā.ī hai

'akmal' insān vo akmal hai ba-faiz-e-fitrat

dard-e-insāñ se jis insāñ kī shanāsā.ī hai

ek nai zist liye aaj ajal aai hai

qaid se hum ne rihai hi kahan pai hai

us se milne ke liye is qadar ai dil na taDap

mera izhaar-e-mohabbat meri ruswai hai

inqilabaat-e-zamana ko zamana samjhe

hum to kahte hain ki wo bhi teri angDai hai

jis ke shoalon se hui husn ki rangat raushan

aag aisi mere jazbaat ne sulgai hai

hum ne armanon ki mayyat ko diya hai kandha

ai gham-e-dil ye teri hausla-afzai hai

hai ye Dar nuh ka tufan na samajh le duniya

chadar-e-ashk-e-wafa hum ne jo phailai hai

aaina-KHana-e-dil mein wo zarur aaenge

un ke dil mein bhi tamanna-e-KHud-arai hai

hath se saqi ke pina hi paDega mujhe ab

meri tauba-shikani ban ke ghaTa chhai hai

'akmal' insan wo akmal hai ba-faiz-e-fitrat

dard-e-insan se jis insan ki shanasai hai