ek patthar rakh liya hai sina-e-sad-chaak par

ek patthar rakh liyā hai sīna-e-sad-chāk par

zabt kā pahra lagāyā dīda-e-namnāk par

kaun hai jis par nahīñ khultā mirā dast-e-hunar

kis kī miTTī ek muddat se rakhī hai chaak par

chaar din meñ hī haqīqat kī zamīñ par aa girā

chaar din meñ bhī uḌā thā ishq ke aflāk par

ye ḳhizāñ peḌoñ se patte dil se ḳhushiyāñ le ga.ī

zor kuchh bhī chal na paayā mausam-e-saffāk par

sānehe paḌte raheñge sach ke raste meñ hazār

uñgliyāñ uThtī raheñgī lahja-e-bebāk par

jo bhī aayā vo tirī āñkhoñ kā ho ke rah gayā

ye bhañvar ab tak na khul paa.e kisī tairāk par

ek patthar rakh liya hai sina-e-sad-chaak par

zabt ka pahra lagaya dida-e-namnak par

kaun hai jis par nahin khulta mera dast-e-hunar

kis ki miTTi ek muddat se rakhi hai chaak par

chaar din mein hi haqiqat ki zamin par aa gira

chaar din mein bhi uDa tha ishq ke aflak par

ye KHizan peDon se patte dil se KHushiyan le gai

zor kuchh bhi chal na paya mausam-e-saffak par

sanehe paDte rahenge sach ke raste mein hazar

ungliyan uThti rahengi lahja-e-bebak par

jo bhi aaya wo teri aankhon ka ho ke rah gaya

ye bhanwar ab tak na khul pae kisi tairak par