ek qadam tegh pe aur ek sharar par rakkha

ek qadam teġh pe aur ek sharar par rakkhā

merī vahshat ne mujhe raqs-e-digar par rakkhā

mere mālik ne tujhe ā.ina-dārī de kar

nigarāñ tujh ko mire husn-e-nazar par rakkhā

lā-ta.alluq nazar aatā thā ba-zāhir lekin

shahr ko us ne mirī ḳhair-ḳhabar par rakkhā

zindagī tū ne qadam moḌ diye aur taraf

aur andar se mujhe aur safar par rakkhā

ahl-e-vahshat ko magar kaun batātā jā kar

ho gayā nāf-e-ġhazālīñ koī ghar par rakkhā

koñpleñ phuuT paḌīñ dast-e-duā se mere

dam-e-āmīn jo meñ dīda-e-tar par rakkhā

ḳhatm hotī hī nahīñ girya-o-zārī un kī

miir ne haath to har lafz ke sar par rakkhā

maiñ ne is Dar se use toḌ liyā hai 'tābish'

suukh jaa.e na kahīñ shāḳh-e-shajar par rakkhā

ek qadam tegh pe aur ek sharar par rakkha

meri wahshat ne mujhe raqs-e-digar par rakkha

mere malik ne tujhe aaina-dari de kar

nigaran tujh ko mere husn-e-nazar par rakkha

la-talluq nazar aata tha ba-zahir lekin

shahr ko us ne meri KHair-KHabar par rakkha

zindagi tu ne qadam moD diye aur taraf

aur andar se mujhe aur safar par rakkha

ahl-e-wahshat ko magar kaun batata ja kar

ho gaya naf-e-ghazalin koi ghar par rakkha

konplen phuT paDin dast-e-dua se mere

dam-e-amin jo mein dida-e-tar par rakkha

KHatm hoti hi nahin girya-o-zari un ki

mir ne hath to har lafz ke sar par rakkha

main ne is Dar se use toD liya hai 'tabish'

sukh jae na kahin shaKH-e-shajar par rakkha