ek rahzan ko amir-e-karwan samjha tha main

ek rahzan ko amīr-e-kārvāñ samjhā thā maiñ

apnī bad-baḳhtī ko manzil kā nishāñ samjhā thā maiñ

terī ma.asūmī ke sadqe merī mahrūmī kī ḳhair

ai ki tujh ko sūrat-e-ārām-e-jāñ samjhā thā maiñ

dushman-e-dil dushman-e-dīñ dhushman-e-hosh-o-havās

haa.e kis nā-mehrbāñ ko mehrbāñ samjhā thā maiñ

dost kā dar aa gayā to ḳhud-baḳhud jhukne lagī

jis jabīñ ko be-niyāz-e-āstāñ samjhā thā maiñ

qāfile kā qāfila hī raah meñ gum kar diyā

tujh ko to zālim dalīl-e-rah-ravāñ samjhā thā maiñ

mere dil meñ aa ke baiThe aur yahīñ ke ho ga.e

aap ko to yūsuf-e-be-kārvāñ samjhā thā maiñ

ik daroġh-e-maslahat-āmez thā terā sulūk

ye haqīqat thī magar ye bhī kahāñ samjhā thā maiñ

zindagī in.ām-e-qudrat hī sahī lekin ise

kyā ġhalat samjhā agar yār-e-garāñ samjhā thā maiñ

pher thā qismat kā vo chakkar thā mere paañv kā

jis ko 'sho.ala' gardish-e-haft-āsmāñ samjhā thā maiñ

ek rahzan ko amir-e-karwan samjha tha main

apni bad-baKHti ko manzil ka nishan samjha tha main

teri masumi ke sadqe meri mahrumi ki KHair

ai ki tujh ko surat-e-aram-e-jaan samjha tha main

dushman-e-dil dushman-e-din dhushman-e-hosh-o-hawas

hae kis na-mehrban ko mehrban samjha tha main

dost ka dar aa gaya to KHud-baKHud jhukne lagi

jis jabin ko be-niyaz-e-astan samjha tha main

qafile ka qafila hi rah mein gum kar diya

tujh ko to zalim dalil-e-rah-rawan samjha tha main

mere dil mein aa ke baiThe aur yahin ke ho gae

aap ko to yusuf-e-be-karwan samjha tha main

ek darogh-e-maslahat-amez tha tera suluk

ye haqiqat thi magar ye bhi kahan samjha tha main

zindagi inam-e-qudrat hi sahi lekin ise

kya ghalat samjha agar yar-e-garan samjha tha main

pher tha qismat ka wo chakkar tha mere panw ka

jis ko 'shoala' gardish-e-haft-asman samjha tha main