ek sadaqat par marna hai ek sadaqat jina hai

ek sadāqat par marnā hai ek sadāqat jiinā hai

shab kī gahrā.ī naapī hai din kī vus.at jiinā hai

vo bhī din the dīvāroñ par jab qurbat ke saa.e the

ab ghar kī chhoTī sī chhat ko hijr kī saa.at jiinā hai

patā kahāñ thā chalte chalte rāheñ bhī kho jaatī haiñ

ab tak jis kā pyaar jiyā hai us kī nafrat jiinā hai

jaane kitnā sochā hogā bastī ke ḳhush-poshoñ ne

tab ye hukm lagāyā hogā sab ko izzat jiinā hai

nahīñ shikāyat mujhe kisī se jag kyoñ mujh se gila kare

is duniyā meñ sab ko apnī apnī qismat jiinā hai

shahr ke saare aḳhbāroñ ne chhāpī hai ye ek ḳhabar

ik din ḳhaak ke har zarre ko dhuup kī shiddat jiinā hai

merā jurm yahī hai maiñ ne jhuuT ke hāthoñ sach bechā

ab to jitne din jiinā hai chashm-e-nadāmat jiinā hai

lekin ye kyā din Dhalte hī chhoḌā saath charāġhoñ ne

ham to ye samjhe the saarī umr mohabbat jiinā hai

baiThī hai bārūd ke uupar kab se ye duniyā 'parvāz'

lagtā hai mere bachchoñ ko Dar aur dahshat jiinā hai

ek sadaqat par marna hai ek sadaqat jina hai

shab ki gahrai napi hai din ki wusat jina hai

wo bhi din the diwaron par jab qurbat ke sae the

ab ghar ki chhoTi si chhat ko hijr ki saat jina hai

pata kahan tha chalte chalte rahen bhi kho jati hain

ab tak jis ka pyar jiya hai us ki nafrat jina hai

jaane kitna socha hoga basti ke KHush-poshon ne

tab ye hukm lagaya hoga sab ko izzat jina hai

nahin shikayat mujhe kisi se jag kyon mujh se gila kare

is duniya mein sab ko apni apni qismat jina hai

shahr ke sare aKHbaron ne chhapi hai ye ek KHabar

ek din KHak ke har zarre ko dhup ki shiddat jina hai

mera jurm yahi hai main ne jhuT ke hathon sach becha

ab to jitne din jina hai chashm-e-nadamat jina hai

lekin ye kya din Dhalte hi chhoDa sath charaghon ne

hum to ye samjhe the sari umr mohabbat jina hai

baiThi hai barud ke upar kab se ye duniya 'parwaz'

lagta hai mere bachchon ko Dar aur dahshat jina hai