ایک صداقت پر مرنا ہے ایک صداقت جینا ہے

ایک صداقت پر مرنا ہے ایک صداقت جینا ہے

شب کی گہرائی ناپی ہے دن کی وسعت جینا ہے

وہ بھی دن تھے دیواروں پر جب قربت کے سائے تھے

اب گھر کی چھوٹی سی چھت کو ہجر کی ساعت جینا ہے

پتا کہاں تھا چلتے چلتے راہیں بھی کھو جاتی ہیں

اب تک جس کا پیار جیا ہے اس کی نفرت جینا ہے

جانے کتنا سوچا ہوگا بستی کے خوش پوشوں نے

تب یہ حکم لگایا ہوگا سب کو عزت جینا ہے

نہیں شکایت مجھے کسی سے جگ کیوں مجھ سے گلہ کرے

اس دنیا میں سب کو اپنی اپنی قسمت جینا ہے

شہر کے سارے اخباروں نے چھاپی ہے یہ ایک خبر

اک دن خاک کے ہر ذرے کو دھوپ کی شدت جینا ہے

میرا جرم یہی ہے میں نے جھوٹ کے ہاتھوں سچ بیچا

اب تو جتنے دن جینا ہے چشم ندامت جینا ہے

لیکن یہ کیا دن ڈھلتے ہی چھوڑا ساتھ چراغوں نے

ہم تو یہ سمجھے تھے ساری عمر محبت جینا ہے

بیٹھی ہے بارود کے اوپر کب سے یہ دنیا پروازؔ

لگتا ہے میرے بچوں کو ڈر اور دہشت جینا ہے