ek samundar ek kinara ek sitara kafi hai

ek samundar ek kināra ek sitārā kaafī hai

is manzar meñ us ke alāva koī akelā kaafī hai

dene vaalā jholiyāñ bhar bhar detā hai to us kā karam

lene vaale kab kahte haiñ daatā itnā kaafī hai

ek ġhalat-andāz nazar se gulshan gulshan daaġh jaleñ

shabnam shabnam rulvāne ko ek hī jumla kaafī hai

ḳhushk laboñ par pyaas sajā.e bahr-e-āshām nahīñ haiñ ham

ham jaisoñ ko tishna-labī meñ ek hī dariyā kaafī hai

ab to aur bhī duniyā.eñ haiñ muntazir-e-arbāb-e-havas

un logoñ kā qaul nahīñ hai ham ko ye duniyā kaafī hai

shahr-e-vafā se dasht-e-junūñ tak chāhe jitne marāhil huuñ

vahshat ke to dūsre ruḳh par ek darīcha kaafī hai

husn-e-suḳhan baaqī rakhne ko kuchh ib.hām zarūrī hai

kahte kahte ruk jaane meñ hai jo ishāra kaafī hai

us ke afsūñ us ke fasāne donoñ ko mas.hūr rakheñ

aql-o-junūñ kī dahlīzoñ par ḳhvāb kā pahra kaafī hai

ek sabhā dil vāloñ kī ik taan rasīle logoñ kī

shahr ke raushan rakhne ko itnā sā ujālā kaafī hai

ek samundar ek kinara ek sitara kafi hai

is manzar mein us ke alawa koi akela kafi hai

dene wala jholiyan bhar bhar deta hai to us ka karam

lene wale kab kahte hain data itna kafi hai

ek ghalat-andaz nazar se gulshan gulshan dagh jalen

shabnam shabnam rulwane ko ek hi jumla kafi hai

KHushk labon par pyas sajae bahr-e-asham nahin hain hum

hum jaison ko tishna-labi mein ek hi dariya kafi hai

ab to aur bhi duniyaen hain muntazir-e-arbab-e-hawas

un logon ka qaul nahin hai hum ko ye duniya kafi hai

shahr-e-wafa se dasht-e-junun tak chahe jitne marahil hun

wahshat ke to dusre ruKH par ek daricha kafi hai

husn-e-suKHan baqi rakhne ko kuchh ibham zaruri hai

kahte kahte ruk jaane mein hai jo ishaara kafi hai

us ke afsun us ke fasane donon ko mashur rakhen

aql-o-junun ki dahlizon par KHwab ka pahra kafi hai

ek sabha dil walon ki ek tan rasile logon ki

shahr ke raushan rakhne ko itna sa ujala kafi hai