ek se ek hai ghaarat-gar-e-iman yahan

ek se ek hai ġhārat-gar-e-īmān yahāñ

ai mire dil tirā allāh nigahbān yahāñ

chhoḌ kar jā.ūñ tire shahr kī galiyāñ kaise

dil yahāñ ruuh yahāñ jism yahāñ jaan yahāñ

kis se pūchhūñ ki vo be-mehr kahāñ rahtā hai

dil-e-be-tāb mirī jaan na pahchān yahāñ

jaane is shahr kā meyār-e-sadāqat kyā hai

but bhī hāthoñ meñ liye phirte haiñ qur.ān yahāñ

TuuT jaa.e to ise dil kā laqab miltā hai

chaak ho jaa.e to hotā hai garebān yahāñ

aur hoñge jinheñ tūfān Dubo detā hai

ham jo Duube to bahut ā.eñge tūfān yahāñ

ab yahī log kareñge na.ī duniyā ta.amīr

tū ne dekhā hai jinheñ be-sar-o-sāmān yahāñ

'saif' kyā ḳhuub zamāne kī havā badlī hai

taḳht-e-tā.ūs pe aa baiThe haiñ darbān yahāñ

ek se ek hai ghaarat-gar-e-iman yahan

ai mere dil tera allah nigahban yahan

chhoD kar jaun tere shahr ki galiyan kaise

dil yahan ruh yahan jism yahan jaan yahan

kis se puchhun ki wo be-mehr kahan rahta hai

dil-e-be-tab meri jaan na pahchan yahan

jaane is shahr ka meyar-e-sadaqat kya hai

but bhi hathon mein liye phirte hain quran yahan

TuT jae to ise dil ka laqab milta hai

chaak ho jae to hota hai gareban yahan

aur honge jinhen tufan Dubo deta hai

hum jo Dube to bahut aaenge tufan yahan

ab yahi log karenge nai duniya tamir

tu ne dekha hai jinhen be-sar-o-saman yahan

'saif' kya KHub zamane ki hawa badli hai

taKHt-e-taus pe aa baiThe hain darban yahan