ek shai thi ki jo paikar mein nahin hai apne

ek shai thī ki jo paikar meñ nahīñ hai apne

jis ko dete ho sadā ghar meñ nahīñ hai apne

tujhe paane kī tamannā tujhe chhūne kā ḳhayāl

aisā saudā bhī koī sar meñ nahīñ hai apne

tū ne talvār bhī dekhī nigah-e-yār bhī dekh

ye tab-o-tāb to ḳhanjar meñ nahīñ hai apne

kis qabīle se uḌā laa.ī hai fauj-e-a.adā

aisā jarrār to lashkar meñ nahīñ hai apne

sar-nigūñ jis kī faqīrī ke muqābil shāhī

ab vo shai mard-e-qalandar meñ nahīñ hai apne

laakh kiije talab-e-rāhat-o-ārām 'sharīf'

kyā milegā jo muqaddar meñ nahīñ hai apne

ek shai thi ki jo paikar mein nahin hai apne

jis ko dete ho sada ghar mein nahin hai apne

tujhe pane ki tamanna tujhe chhune ka KHayal

aisa sauda bhi koi sar mein nahin hai apne

tu ne talwar bhi dekhi nigah-e-yar bhi dekh

ye tab-o-tab to KHanjar mein nahin hai apne

kis qabile se uDa lai hai fauj-e-ada

aisa jarrar to lashkar mein nahin hai apne

sar-nigun jis ki faqiri ke muqabil shahi

ab wo shai mard-e-qalandar mein nahin hai apne

lakh kije talab-e-rahat-o-aram 'sharif'

kya milega jo muqaddar mein nahin hai apne