ایک تحریر کا عنوان نہ ہو جاؤں کہیں

ایک تحریر کا عنوان نہ ہو جاؤں کہیں

میں کسی اور کی پہچان نہ ہو جاؤں کہیں

وہ کرے سب کی مسیحائی مجھے تو بخشے

اس کے الطاف پہ قربان نہ ہو جاؤں کہیں

کوئی تعبیر مقید ہے مرے خوابوں میں

روح اور قلب سے زندان نہ ہو جاؤں کہیں

مجھ سے ہوگا نہ منور کوئی گوشہ دل کا

میں تمناؤں کا لوبان نہ ہو جاؤں کہیں

زندگی آج تری فکر نہیں کی لیکن

کل میں تجھ ہی سے پریشان نہ ہو جاؤں کہیں

شعر کہنے کا سلیقہ مجھے آئے جب تک

ڈر ہے میں صاحب دیوان نہ ہو جاؤں کہیں

میری نظروں میں جو منظر ہیں مسلسل رقصاں

ان کے سر تال کا سامان نہ ہو جاؤں کہیں

سج گئے اپنے در و بست تو ببیاکؔ مگر

اب میں گھر کے لیے مہمان نہ ہو جاؤں کہیں