ek tahrir ka unwan na ho jaun kahin

ek tahrīr kā 'unvān na ho jā.ūñ kahīñ

maiñ kisī aur kī pahchān na ho jā.ūñ kahīñ

vo kare sab kī masīhā.ī mujhe to baḳhshe

us ke altāf pe qurbān na ho jā.ūñ kahīñ

koī tā'bīr muqayyad hai mire ḳhvāboñ meñ

ruuh aur qalb se zindān na ho jā.ūñ kahīñ

mujh se hogā na munavvar koī gosha dil kā

maiñ tamannāoñ kā lobān na ho jā.ūñ kahīñ

zindagī aaj tirī fikr nahīñ kī lekin

kal maiñ tujh hī se pareshān na ho jā.ūñ kahīñ

she'r kahne kā salīqa mujhe aa.e jab tak

Dar hai maiñ sāhib-e-dīvān na ho jā.ūñ kahīñ

merī nazroñ meñ jo manzar haiñ musalsal raqsāñ

un ke sur-tāl kā sāmān na ho jā.ūñ kahīñ

saj ga.e apne dar-o-bast to 'bebāk' magar

ab maiñ ghar ke liye mehmān na ho jā.ūñ kahīñ

ek tahrir ka 'unwan na ho jaun kahin

main kisi aur ki pahchan na ho jaun kahin

wo kare sab ki masihai mujhe to baKHshe

us ke altaf pe qurban na ho jaun kahin

koi ta'bir muqayyad hai mere KHwabon mein

ruh aur qalb se zindan na ho jaun kahin

mujh se hoga na munawwar koi gosha dil ka

main tamannaon ka loban na ho jaun kahin

zindagi aaj teri fikr nahin ki lekin

kal main tujh hi se pareshan na ho jaun kahin

she'r kahne ka saliqa mujhe aae jab tak

Dar hai main sahib-e-diwan na ho jaun kahin

meri nazron mein jo manzar hain musalsal raqsan

un ke sur-tal ka saman na ho jaun kahin

saj gae apne dar-o-bast to 'bebak' magar

ab main ghar ke liye mehman na ho jaun kahin