ek to duniya ka karobar hai

ek to duniyā kā kārobār hai

ishq kā us par alag āzār hai

kaun is jā sāhab-e-kirdār hai

har koī bas ġhāzī-e-guftār hai

subah tak uThtī rahī āh-o-fuġhāñ

kaun mujh meñ shaam se bedār hai

ahl-e-dil aa.e yahāñ tāḳhīr se

ab kahāñ vo garmī-e-bāzār hai

shor meñ Duubā huā hai ghar tamām

aur sannāTā pas-e-dīvār hai

maiñ huā be-lutf us ke qurb se

vo bhī merī shakl se bezār hai

saare dushman ho ga.e zer-e-nagīñ

ḳhud se ab vo bar-sar-e-paikār hai

har qadam par laḌkhaḌātā huuñ 'salīm'

rāsta shāyad bahut hamvār hai

ek to duniya ka karobar hai

ishq ka us par alag aazar hai

kaun is ja sahab-e-kirdar hai

har koi bas ghazi-e-guftar hai

subah tak uThti rahi aah-o-fughan

kaun mujh mein sham se bedar hai

ahl-e-dil aae yahan taKHir se

ab kahan wo garmi-e-bazar hai

shor mein Duba hua hai ghar tamam

aur sannaTa pas-e-diwar hai

main hua be-lutf us ke qurb se

wo bhi meri shakl se bezar hai

sare dushman ho gae zer-e-nagin

KHud se ab wo bar-sar-e-paikar hai

har qadam par laDkhaData hun 'salim'

rasta shayad bahut hamwar hai